23-07-2019
[1. 白羅斯唔鐘意人哋叫佢哋做白俄羅斯／白嘅俄羅斯，中文要正名做白羅斯，噉就... 順佢意。]
[2. 現時白羅斯對香港特區護照、澳門特區護照、中國護照，都係全白羅斯普通旅客免簽。英葡等護照只有局部免簽，譬如要喺明斯克機場入境同出境。（免簽唔可以直接往來白羅斯同俄羅斯之間。）呢篇嘢係講緊二零一九年七月嘅情況；出入境條例嘅嘢隨時都可以變。你要去嘅話，務必請自己再 check 吓先。]
我人生都叫做經歷過好多個國家地區嘅邊境檢查；今次覺得有需要寫篇文。我去白羅斯之前，參考過幾篇其他旅客寫關於白羅斯陸路過關嘅文章，獲益良多。噉我亦喺度分享吓我嘅經驗。
二零一九年中，喺捷克開完會之後開始遊蕩式旅行，即是事前乜都冇 book，連點翻屋企都未諗。（不過我住喺西歐，要翻屋企好容易。）我原本諗住重遊幾年前去過嘅烏克蘭利維夫 Lviv。之後上網睇見有人話白羅斯嘅 格羅德諾 Hrodna / Grodno 係「白羅斯嘅利維夫」，噉我就研究吓可以點去呢個接近波蘭同立陶宛嘅城市，上網參考吓人哋過白羅斯陸路邊檢嘅經驗。
我知香港特區護照去白羅斯免簽，但係都係去白羅斯外交部網頁證實一吓好啲。驚慄點 no.1 嚟嘞：白羅斯外交部網頁嘅免簽名單中（英／白／俄文），當時只有列出中華人民共和國，冇列明香港／澳門特區護照係唔係免簽（而家有列明）。跟住我搵咗一輪，搵倒白羅斯駐中國大使館關於中港澳護照去白羅斯免簽嗰頁 （主頁 > Консульские вопросы > Безвизовый въезд в Беларусь）。我 save 定呢一頁等我可以 offline load 佢出嚟，有需要嘅話畀個關員睇。（結果冇需要出動到呢招；但係有時啲嘢，真係好難講，你都係 save 定呢兩頁官方文件好啲，有需要嘅話可以 offline load 翻佢出嚟畀關員睇。）
我睇過其他人網上講白羅斯嘅陸路過關經驗，話白羅斯關員要睇有 cover 白羅斯一萬歐羅嘅旅遊保險單（只有某啲前蘇聯國民唔使呢樣要求）。有啲人話張保單係英文都得。不過網上官方資料話如果保單唔係白文或者俄文嘅話，要有 certified 翻譯本。噉為求減低麻煩機會，（即使我已經有旅遊保險，）我幫襯咗佢哋嘅官方保險機構，幾日都係幾歐啫，呢啲安心嘢買得過。
波蘭有火車去格羅德諾，不過班次好少；想嘅話可以去波鐵網站睇吓往返 Grodno 嘅班次。（聽其他旅客講，搭火車嘅話，白羅斯邊檢係喺格羅德諾火車站入面。你搭火車離開白羅斯嘅時候，要老早就去火車站過關；如果你出發前十幾分鐘先至去到格羅德諾火車站，就冇得過關㗎嘞。）立陶宛冇火車直接去格羅德諾；條路軌喺邊境斷埋。
巴士就方便好多，班次又多。我搭火車去到波蘭 Białystok，跟住搭巴士去格羅德諾。（其實波蘭有好多城市有直班巴士去格羅德諾或者白羅斯其他地點。不過我係鐵膠，所以幫襯吓波鐵。不過小心火車誤點；我搭大清早喺始發站開出嘅車都遲咗半個鐘開出。）我見倒有啲人去到 Białystok 長途巴士站先至買飛，不過我就穩陣啲，Białystok 去格羅德諾呢一程，同埋三日後格羅德諾去立陶宛維爾紐斯呢一程嘅巴士飛，我之前已經上網買定。我幫襯呢間公司；我只係見乜 book 乜，我冇研究過有冇其他公司可以揀。佢個英文售票 interface 唔 work，我搵 Google Translate 幫一幫手，撳佢個波蘭文 interface。（結果張飛係出俄文嘅。）佢哋公司嘅時間表。（唔知 up 唔 update；同埋留意夏令冬令時間轉變嘅問題。現時白羅斯同俄羅斯冇轉夏令時間，歐盟有，不過歐盟有可能呢幾年內改變呢個政策。）
今次旅行十分倉卒；出門前忙於準備個 conference talk，好多嘢都冇帶，譬如本俄文 phrase book。（出門前其實冇諗過去白羅斯。）結果我就噉用 Google Translate 撳定啲唔知啱唔啱嘅波蘭文同俄文句子，上車前背定啲巴士司機同關員可能會問嘅問題同答案。
（我係語言學家；同啲不明語言摔跤係我嘅專業。我啲波蘭文白羅斯文俄羅斯文程度：字母認得，對佢嘅音韻有啲概念，但係連「一二三」、「哈佬」之類嗰啲我都要日日再查。我冇學過捷克、波蘭、白羅斯、俄羅斯呢啲斯拉夫系語言；我受虐癖程度未高到走去學斯拉夫語言。立陶宛文就更癲，有興趣但係未有勇氣去學。）
驚慄點 no.2 嚟嘞：波蘭嗰個巴士司機。唔係話個巴士司機恐怖，我只係驚溝通唔嚟，應付唔倒佢問我關於過境嘅問題，搞到佢唔畀我上車。架巴士係波蘭車牌，正正常常一架 condition 唔錯嘅旅遊大巴。行走路線絕大部分喺波蘭國內，只係終點一段仔走咗入白羅斯。我以為司機係波蘭人，我就準備好腦海裏面嘅波蘭台。
上車同個司機用波蘭文打個招呼、show 車飛、對名（網上訂嗰張飛有姓名等資料，佢要同佢嘅名單核對）。跟住佢要睇我本護照。我畀我本香港護照佢睇。
司機：咩嚟㗎？
我：‘To jest hongkongski paszport. Chiński paszport.’
（啲人好多冇聽過香港呢個地方。你揸澳門護照嘅話就更加唔使諗。）
司機：‘Китайский паспорт?’
原來係講俄文嘅。噉我嘗試即刻轉俄文台。但係因為畀佢嚇咗一嚇，變咗做波俄兩溝台。（不過波俄文兩溝，某程度上就係白羅斯文。）
我：‘Так, кітайскі пашпарт. Кітайскі пашпарт… для всей Беларуси… виза не требуется.’
（係，中國護照。中國護照... for 整個白羅斯，簽證唔使。）
唔知講得啱唔啱。是旦啦。我已經好驚。
跟住佢畀個「 OK 樣」我。
跟住佢又噏咗段我完全唔明嘅俄文，我只有 O 嘴回應。有另外一個乘客噏咗個英文字：「鋪崙」。哦！個司機係問我波蘭點出境。噉我就畀咗另一本護照佢睇（其實就咁指住本香港護照都得）。跟住佢又畀個 OK 樣我。
成功上車！
車上我估有十幾人，唔多。我就噉擺咗啲行李喺隔籬個位。跟住我瞓着咗。唔係好耐之後就到邊境。波蘭關員上咗我哋架巴士。
波蘭關員：‘Dzień dobry.’
我：‘Dzień dobry.’
我畀咗我本護照佢。佢對吓幅相同我塊面。（佢冇理會我有冇白羅斯簽證。）跟住佢就繼續收後面嗰啲乘客嘅護照。佢收晒啲乘客護照之後就走翻去佢嘅辦公室。我落車跟住啲同車乘客衝咗去廁所。其實唔使衝，因為佢處理啲乘客護照都要一段時間。唔係太耐之後，啲乘客上翻晒車，關員發還護照，開閘放行。
過咗界入白羅斯，氣氛有啲似卅年前過關去大陸噉，心情有啲沉重。驚慄點 no.3 嚟嘞：個白羅斯移民關員上車，逐一乘客收護照。個關員本身就唔係兇神惡剎樣嘅，但係佢套共產 style 軍官制服已經好氣勢逼人。（不過佢好靚仔；我人生未試過起痰起得咁驚慄。）佢收咗我本香港護照，對樣，叫我除眼鏡，再對樣。跟住佢揭揭揭揭揭揭揭揭揭揭揭揭我本護照（我本香港護照完全係空嘅），問：簽證呢？
有個共產軍服官員喺我面前，揸住我本護照，用我唔明嘅語言，把聲低咗半個八度，問我點解你本護照裏面冇簽証？！；我心裏面已經嚇到瀨屎，之前背好晒嗰啲俄文句子冚唪唥唔叉記得晒。
但係都係要畀反應佢，我是但噏：
‘Гонконгский паспорт... Китайский паспорт...’
（香港護照... 中國護照...）
正當我諗緊應該點完成呢句句子嘅時候，佢已經「哦」咗一聲。好似過咗骨。
跟住佢又用俄文問咗我個唔知咩問題；我只能夠 O 嘴回應。
之前我已經準備定幾樣佢可能想睇嘅文件，有旅遊保險單、當地住宿證明、離開嘅車飛。噉我就是但，睇吓佢係唔係要睇保單。
佢攞住我部電話，放大放大放大睇睇睇睇張保單。跟住畀翻部電話我。
又過骨。完成！跟住佢就繼續檢查其他乘客。檢查完之後佢就帶同所有護照落車。我心情仍然十分忐忑。（其實冇乜嘢，只係驚溝通唔嚟。）
過咗好一段時間，共產軍服靚仔關員又行翻過嚟。佢揸住我本護照，問咗我一個唔知咩問題。我攞住我部電話，半假裝嘗試打佢噏嗰段俄文入 offline 嘅 Google Translate （電話 load 定 offline 嘅 Google Translate 同俄文 keyboard）。我打咗幾隻俄文字母之後，佢攞咗我部電話佢自己打，我十分感謝합니다。奈何 offline 嘅翻譯 quality 實在太渣，translate 咗同冇 translate 冇乜分別。好在我至少認得佢嗰段俄文中嘅其中兩隻字： дней 「日子（複數）」 同 белорусь 「白羅斯」。哦，佢係問我喺白羅斯逗留幾多日。噉我就照讀之前準備定嗰句「星期一去維爾紐斯」。佢畀翻本護照我。裏面已經有白羅斯嘅入境印。
大～解～脫～！！！好強勁嘅成就感。
（之後發現其實喺邊境仍然可以用波蘭嘅手機網絡，我用歐盟 SIM card，其實可以用 online 嘅 Google Translate。）
跟住仲有海關。佢處理一架巴士／麵包車嘅乘客，每架要廿鯪分鐘，前面仲有四五架車。啲乘客瞓覺吹水聽歌睇戲睇書打機打坐煲煙（出面）消磨住時間先。過咗唔知幾多個時辰，終於輪到我哋嘞。我哋落車帶同行李入去畀佢檢查。有啲人要打開行李檢查，我就就噉擺個喼入部機就得嘞。
好嘢！終於放行！噉我就通知住宿點嘅負責人，話我過晒關嘞，就嚟到。
我一撳 send，心情大解脫，終於可以起行！
轉個彎，點知又有一條隊...
不過呢條隊就唔係好耐，我哋坐喺車入面，佢淨係再 check 車內嘅人數，同 check 架巴士啲文件（可能係車嘅保險之類）。
終於搞掂！波蘭出境同白羅斯入境，總共搞咗兩個半鐘。班巴士比原定時間遲咗個鯪鐘抵達格羅德諾。
呢個城市個名，白羅斯文係 Гродна (Hrodna)，俄羅斯文係 Гродно (Grodno)，波蘭文係 Grodno，立陶宛文係 Gardinas。同世界其他地區一樣，呢一帶嘅邊界／政權變過好多次。除咗白羅斯外，歷史上格羅德諾曾經隸屬立陶宛、波蘭、俄羅斯、同蘇聯。現今該地區人口主要係白羅斯裔，波蘭裔亦都唔少。市面主要有俄羅斯文同白羅斯文。波蘭文亦都有，尤其係同天主教有關嘅嘢。（波裔主要係天主教，白裔主要係東正教。）
我當初選擇嚟呢個地方，係因為睇見有人形容格羅德諾為「白羅斯嘅利維夫」。我對烏克蘭嘅利維夫好有好感，念念不忘。但係，坦白講，呢個「白羅斯嘅利維夫」同真嗰個利維夫爭咗好遠... 啲人叫格羅德諾做白羅斯嘅利維夫，可能只係因為喺白羅斯，格羅德諾保留古舊建築物呢方面已經算係好好，都係波蘭立陶宛式嘅風格。利維夫大格羅德諾一倍，利維夫舊城區係世遺點，（係有啲殘，但係）啲靚建築物好集中。利維夫又有個機場，有歐洲廉航到達，我接觸過嘅烏克蘭關員啲英文好掂（當年我係陸路出入境），同埋利維夫應對西方遊客嘅配套算係唔錯。而格羅德諾，我見倒佢係努力緊，但係一來佢細好多，冇咁多靚建築物，二來佢應對非俄系遊客呢方面起步遲，有好多嘢要追。不過佢係有潛質嘅，我好悠閒地過咗兩整日，算係開心舒服嘅，十分 hea，飲食滿意。市中心好多櫃員機，撳錢容易，但係找換店唔係咁易搵。啲嘢冇我想像中咁平，但係唔算貴。我冇去佢郊區，去郊外活動應該係好好嘅去處。
我就唔再多講，不如睇吓相。
我朝早行去長途巴士總站。巴士站範圍有兩座建築物大大隻字寫話係 Автовокзал；南面近大街嗰個係去近郊嘅，北面嗰個先至係長途巴士站。
我嗰班車嘅司機，笑笑口，飛又冇 check，護照又冇 check，佢 check 吓人數，噏咗幾句唔知乜，就行嘞。
冇幾耐就到咗邊境嘞。巴士停低，有個白羅斯移民關員上咗車，逐個乘客收護照，對相對樣。坐喺我隔籬嘅係一位白羅斯人女士，再隔籬我估係佢兩個年幼仔女。個關員問嗰位女士我係唔係佢老公。關員同前後左右乘客都笑咗一笑。
跟住關員問我：'Do you speak Russian?'
第一次有白羅斯關員用英文問我。不過呢句係唯一一句完整嘅英文句子。
我：'Нет.' (俄文：否)
關員：吓？噉你講緊乜話？
關員同前後左右乘客又笑咗一笑。
跟住又係對相對樣，叫我除眼鏡，跟住再對相對樣。
關員再問：Voucher?
講到呢度要解釋一吓。白羅斯有好多唔同嘅特定免簽計劃（譬如地域限定、event 限定嘅免簽計劃），多到連啲關員都唔係好清楚得晒啲條款。佢哋格羅德諾地區有佢自己嘅免簽計劃，免除好多國家嘅旅客申請一般嘅白羅斯簽證。但係呢個免簽計劃，一來只係局限於格羅德諾地區，二來其實係要事先幫襯指定嘅旅行社，買啲當地嘅旅遊產品，即係住宿交通觀光活動嗰啲。個關員以為我係呢類遊客，佢要睇旅行社出嘅 voucher。
我冇旅行社出嘅 voucher；中港澳護照跟本就成個白羅斯都免簽，可以喺任何一個正常邊檢站出入境。
噉我又重施故技，不過今次自信好多：
‘Гонконгский паспорт. Китайский паспорт.’ （香港護照。 中國護照。）
關員「哦」咗一聲。
又過骨。佢繼續處理後面嗰啲乘客。
全車都係白羅斯人（我睄倒啲人啲護照封面，或者護照背面嘅顏色），除咗一位係南美人士。關員問咗佢好多問題。關員自己講啲英文，或者有其他乘客翻譯。
關員收晒啲護照，落車翻翻去佢辦公室。噉啲人就去廁所、煲煙、免稅店之類。啲人完全冇急過，因為都知道要等一段時間。
過咗 n 分鐘，關員終於發還護照嘞。但係就除咗我同嗰位南美人士嘅護照。關員噏咗句唔知乜嘅俄文，跟住有位後生女乘客用流利嘅英文翻譯畀我哋聽，話護照要畀佢上司睇睇，五分鐘後發還。
哦，OK。我心裏面又忐忑咗少許。
跟住啲人又係落車去廁所、煲煙、免稅店之類。啲白羅斯人好有耐性嘅。
如是者又過咗十五二十分鐘，關員終於翻嚟嘞。我心裏面已經準備定啲俄文句子，等佢發問。I’m ready.
點知佢就噉畀翻本護照我，裏面已經有白羅斯嘅出境印。
又過骨。完成！
至於後面嗰位南美人士，關員又再問佢一啲問題。關員要睇佢 2019 明斯克歐洲運動會嘅飛。（呢個又係另外一個免簽計劃嘅條件，限於明斯克歐運會期間。不過呢個 plan 應該係唔畀陸路出入境嘅，係要喺明斯克機場入出境嘅。我知，因為我喺格羅德諾識咗一位呢類旅客，之前佢戇嘟嘟想由明斯克陸路去維爾紐斯，結果喺邊境畀個白羅斯關員唔畀佢喺嗰度出境，噉佢就輾轉去咗格羅德諾。之後佢遊埋布列斯特，最後翻去明斯克飛出境。）
Anyway，唔知佢點搞掂，最後所有人都順利過關，終於放行！
（之後我屎忽痕上網睇，嗰位南美人士嘅護照，去白羅斯根本就免簽，仲有九十日咁多。）
過立陶宛嗰關就冇乜嘢嘅。架巴士停低落車，乘客行入去間房仔，個立陶宛關員 check 吓我本護照，用英文問我去邊，我話去維爾紐斯，搞掂，行翻出房。
個巴士司機由個巴士車尾箱攞晒啲行李出嚟。嗰度有張枱，我諗係畀海關關員檢查行李用嘅。噉我哋就企喺啲行李附近，等啲人檢查完護照行翻出嚟，同埋等個海關關員嚟。
唔係好耐，所有人都檢查完護照嘞。個移民官員行咗去第二度。跟住冇幾耐，就開閘嘞。咦？海關呢？唔使 check 行李囉喎！啲行李擺翻晒入架車度，上車起行！歐盟萬歲！架白羅斯巴士，入咗立陶宛境內，即刻有 WiFi。歐盟萬歲！
呢班車立陶宛有兩個站；好多人喺邊境附近嘅 Druskininkai 落車。大約三四成人搭到去首都維爾紐斯。立陶宛呢個咁容易去嘅國家，又神根區又使歐羅嘅，我就唔多講嘞。維爾紐斯好靚。
（留意：好似話二零二一年開始，免簽去愛爾蘭以外嘅歐盟／神根區嘅外地人士，多數須要預先網上登記，同美加澳紐嗰啲網上登記差唔多。）
我兩樣都冇經驗：